Liviyada 10 günlük küçəyə çıxma qadağası elan edilib

Birləşmiş Millətlər Təşkilatı(BMT) nəzdində qanuni Liviya Milli Konsensus Hökuməti, koronavirus(COVID-19) tədbirləri çərçivəsində cümə günündən etibarən 10 günlük küçəyə çıxma qadağası elan edib.

Liviyada COVID-19 yoluxma sayının 35-ə yüksəlməsindən sonra, paytaxt Tripolidə Anti-Koronavirus Ali Komitəsi tərəfindən mətbuat konfransı keçirilib. Bildirilib ki, bütün tərəvəz və ət bazarları küçəyə çıxma qadağası çərçivəsində bağlanacaq, ancaq çörək və bəzi dükanlar insanların ehtiyaclarını ödəmək üçün açıq qalacaq.

Qadağaya təcili yardım maşınları, çörəkbişirmə məntəqələri, bəzi dükanların aid edilməyəcəyi və vətəndaşların maska taxdıqları təqdirdə yerli vaxtla 08:00-dan 14:00-a qədər piyada gəzməyə icazə veriləcəyi qeyd edilib.