Amerikalı mütəxəssislər Covid-19’un Uhan şəhərindəki laboratoriyadan sızdığını hesab edir

Bu haqda ABŞ-da fəaliyyət göstərən FoxNews telekanalı xəbər verib.

Kanal öz mənbələrinə istinadən xəbər verir ki, Covid-19 Çində virusları tədqiq edən laboratoriyalardan birindən kənara sızıb. O da vurğulanır ki, Uhandakı laboratoriyanın çalışdığı viruslar baktereoloji silah kimi istifadə üçün nəzərdə tutulmayıb.

FoxNews-da olan məlumata əsasən, bu virusa ilk yoluxan insan məhz laboratoriyanın əməkdaşı olub, daha sonra bu insanın Uhan şəhərindəki ünsiyyətdə olduğu insanlar vasitəsi ilə virus geniş yayıla bilib və şəhəri Koronavirusun əsas yayılma ocağına çevirib.

Həmçinin telekanalın verdiyi məlumatda o da qeyd edilir ki, Çin hökümətinin virusun insana keçdiyi ilk yer kimi göstərdiyi bazar bu ölkənin hökumətinin bazardan bir neçə kilometr aralı, Uhanda fəaliyyət göstərən laboratoriyadan fikir yayındırmaq cəhdindən başqa bir şey deyil.

Çərşənbə axşamı, Washington Postun verdiyi məlumata görə, hələ 2018–ci ilin yanvar ayında Pekindəki ABŞ səfirliyi Çin hökumətini Uhandakı Virusologiya institutunda və onun laboratoriyalarında təhlükəsizlik tədbirlərinin lazimi səviyyədə olmaması ilə bağlı məlumatlandırıb.

Qeyd edək ki, Uhandakı sözü gedən laboratoriya Fransa hökumətinin yardımı ilə qurulub.

Amerikan mənbələri bildirir ki, virusun laboratoriyadan sızma ehtimalı peyda olan kimi Çin hökuməti buna işarə edə biləcək bütün maddi sübutları məhv edib və dünya miqyasında öz imicini ağartmaq üçün geniş təbliğat kampaniyasına başlayıb.

İlkin mərhələdə Çində bu virusun insandan-insana keçməsi haqda məlumat verən çinli həkim və jurnalistlərin də bir çoxunun yoxa çıxması virusun əsl mənbəsi haqqında şübhələri artırır. Əldə olunmuş məlumatlar, Çin hökümətinin ilkin mərhələdə gördüyü tədbirlərin virusun deyil, virus haqqında məlumatların dünya ictimaiyyətinə sızmasının qarşısını almağa yönəldiyini göstərir.