Bu şəhərdə məhdudiyyətlər mayın 15-dən yüngülləşdirilə bilər

“Nyu-York ştatında koronavirusun yayılmasının qarşısını almaq üçün tətbiq olunan karantin məhdudiyyətləri mayın 15-dən sonra bəzi bölgələrdə yüngülləşdirilə bilər”.

Kanal8-in xarici mətbuata istinadən verdiyi xəbərə görə, bunu Nyu-York ştatının qubernatoru Endryu Kuomo jurnalistlərlə görüşündə deyib.

Kuomo bildirib ki, mövcud qaydaya əsasən, karantin tədbirləri mayın 15-dək qüvvədə olacaq: “Çox güman ki, bu tədbirləri ştatın bir çox bölgəsində qüvvədə qalacaq. Lakin bəzi bölgələrdə mövcud epidemioloji vəziyyətdən asılı olaraq məhdudiyyətlərin yüngülləşdirilməsi imkanları nəzərdən keçirilə bilər. Bu, həddən artıq ehtiyatla həyata keçirilməlidir”.

Qubernator, həmçinin, ştatda ölüm hallarının azalmaqda davam etdiyini vurğulayıb: “Son bir gündə 337 nəfər ölüb, onlardan 313-ü xəstəxanada, 24-ü isə qocalar evində qeydə alınıb. Bir gün əvvəl bu göstərici 367 idi. Lakin ölümlərin sayı hələ də olduqca yüksək səviyyədə qalır”.