Tokio Olimpiyadası ləğv oluna bilər

2021-ci ilə təxirə salınan Tokio-2020 Yay Olimpiya Oyunları ləğv oluna bilər.

Kanal8-in məlumatına görə, bunu yarışın Təşkilat Komitəsinin prezidenti Yoşiro Mori açıqlayıb.

O bildirib ki, Olimpiadanın təxirə salınmasına səbəb olan koronavirus pandemiyası nəzarətə götürülməsə dördilliyin mötəbər yarışı ləğv olunacaq. Morinin sözlərinə görə, 2021-ci il iyulun 23-də start götürməli olan yarış yenidən təxirə salınması mümkün deyil: “Əgər pandemiya təhlükəsi qalsa, Olimpiada 2022-ci ilə təxirə salınmayacaq. Belə olan halda yarış ləğv ediləcək. Oyunlar indiyədək yalnız müharibə illərində ləğv olunub. Əgər virusun qarşısı alınsa, Olimpiadanı gələn ilin yayında təşkil edəcəyik. Bütün insanlar buna ümid edir”.

Yaponiya Tibb Assosiasiyasının Olimpiadanın gələn il keçirilməsinin çox çətin olacağı ilə bağlı xəbərdarlıq edib. Qurumun rəhbəri Yositaki Yokokura bunun ağır olacağını bildirib: “Deməzdim ki, Olimpiadanı keçirmək olmaz. Amma bu çox çətin olacaq”.