Türkiyə ilə eyni zamanda “Sepah” da Şimali İraqda “PKK” və “PJAK”ı bombalayıb

Türkiyənin İraqın Kürdüstan Muxtariyyətində anti-terror əməliyyatına başladığı vaxtda “Sepah” da kürd terror təşkilatlarını bombaladığı barədə məlumat yayıb.

“Sepah”ın yaydığı məlumata əsasən, keçirilən əməliyyat nəticəsində İraqla İran sərhədi yaxınlığında Alanə və Hacı Ümran dağlarında yerləşən “PKK” və “PJAK” terror təşkilatlarına məxsus mövqelər ağır artileriya və raket atəşinə tutulub.

Bu gün Türkiyənin Müdafiə Nazirliyi isə yaydığı bəyanatda keçirilmiş hava hücumu və ağır artileriya atəşləri nəticəsində İraqın şimalında yerləşən Həftanin bölgəsindəki “PKK” mövqelərinin məhv edildiyini bildirib.

Türkiyə mediasının xəbərinə görə, helikopterlərin bombardımanından sonra Komando Birlikləri quru və hava yolu ilə sözügedən bölgəyə daxil olublar.

Türkiyə İraq Kürdüstanında anti-terror əməliyyatlarına dünən start verib. Həmin əsnada “Sepah”ın da bölgədə yerləşən “PKK” və “PJAK” mövqelərini ağır artileriya və raket atəşinə tutması barədə məlumatlar yayılsa da, “Sepah” həmin xəbərləri bu gün rəsmi qaydada təsdiqləyib.

Xatırladaq ki, bu əməliyyatın başlanmasından bir gün əvvəl İranın Xarici İşlər naziri Məhəmməd Cavad Zərif Türkiyəyə rəsmi səfərə getmişdi. “Reuters” agentliyi Zərifin səfər çərçivəsində türkiyəli rəsmilərlə sözügedən əməliyyatları başlatmaq üçün razılıq əldə etdiyi barədə xəbər yayıb.

Müştərək hücumun martın 31-də “PKK” terror təşkilatı tərəfindən İrandan Türkiyəyə qaz nəql edən boru kəmərinin kamikadze hücumu nəticəsində partladılmasına cavab xarakteri daşıdığı ehtimal edilir.