Anar Ələkbərov Şeyx Əbdülə zəng etdi

Prezidentin köməkçisi Anar Ələkbərov dünən mənə zəng etdi. Səhhətimlə maraqlandı. Bildirdi ki, Heydər Əliyev Fondu müalicəm üçün hər şeyi edəcək.

Bunu Kult.az-a açıqlqmasında xalq artisti, kinorejissor Şeyx Əbdül Mahmudbəyov səhhəti ilə bağlı danışarkən deyib. O bildirib ki, müalicəsinin xaricdə davam etdirilməsi mümkün olmayıb:

“Xaricdə müalicə məsələsi qaldı. Çünki hazırda pandemiya dövrüdür. Səhiyyəsi yüksək səviyyədə olan ölkələr Azərbaycandan pasiyent qəbul etmirlər”.

Şeyx Əbdül bildirib ki, Prezidentin köməkçisinin göstərişi ilə hazırda yüksək ixtisaslı həkimlər onun sağlamlığının keşiyində dururlar:

“Anar müəllim Afət xanım adında bir nəfəri mənə ayırıb. Ona sürücü də veriblər. Mənimlə mütəmadi maraqlanır. Dərmanlarımı alıb gətirir. Anar müəllim dedi ki, siz müalicənizi hansı şəraitdə və necə istəyirsiniz davam etdirə bilərsiniz. Hazırda müalicəmi “Atlas” klinikasında davam etdirirəm. Burada mənə hər cür şərait yaradılıb”.

Xalq artisti səhhətindəki xərçəng riskindən də danışıb:

“Dörd ay həkim və xəstəxana axtardım. Düzgün diaqnoz qoya bilmirdilər. Dünən müayinədən keçdim. Elə bildilər ki, xərçəng xəstəliyim var. Analizlərin cavabı çıxdı. Çox şükür, hər şey qaydasındadır. Mədəmdə və bronxlarımdadır əsas problem”.